គ្រឿងញៀនជិត ២០០គីឡូក្រាម ត្រូវបានសមត្ថកិច្ចបង្ក្រាបបាន នៅខេត្តស្ទឹងត្រែង ដែលឈ្មួញលួចដឹកតាមទន្លេពីឡាវ
ស្ទឹងត្រែង ៖ គ្រឿងញៀនជិត ២០០គីឡូក្រាម ត្រូវបានជនសង្ស័យមួយក្រុមលួចដឹកតាមទន្លេមេគង្គពីប្រទេសឡាវចូលមកកម្ពុជា។ គ្រឿងញៀនដ៏ច្រើនសន្ធឹកសន្ធាប់នេះ ត្រូវបានកម្លាំងសមត្ថកិច្ចកម្ពុជាបង្ក្រាបបាននៅចំណុចកោះល្ង ឃុំព្រះរំកិល ស្រុកបុរីអូរស្វាយសែនជ័យ ខេត្តស្ទឹងត្រែង ប៉ុន្តែជនល្មើសបានរត់គេចអស់។
មន្ត្រីសមត្ថកិច្ចការពារព្រំដែនបានឱ្យដឹងថា នាវេលាយប់ថ្ងៃទី២៤ ខែវិច្ឆិកា ឆ្នាំ២០២១ ក្នុងពេលកម្លាំងនគរបាលការពារព្រំដែនកំពុងចុះល្បាតតាមដងទន្លេ ក៏ប្រទះឃើញកាណូតមួយគ្រឿងបើកពីកោះស្តាំ ស្រុកមឿងខូង ប្រទេសឡាវ ឆ្លងកាត់ចូលមកទឹកដីឃុំព្រះរំកិល ស្រុកបុរីអូរស្វាយសែនជ័យ។ នៅលើកាណូតនោះឃើញមានផ្ទុកទំនិញនៅក្នុងបាវជាច្រើន។
ដោយសង្ស័យជារបស់គេចពន្ធ កម្លាំងនគរបាល ក៏បានដេញតាមឱ្យឈប់ដើម្បីត្រួតពិនិត្យ។ រហូតដល់ចំណុចកោះល្ង ភូមិសាស្ត្រឃុំព្រះរំកិល ស្រុកបុរីអូរស្វាយសែនជ័យ ជនល្មើសបានបើកកាណូតរត់ឡើងគោក ហើយនាំគ្នារត់គេចខ្លួនបាត់ស្រមោល។ កម្លាំងនគរបាលបាល ក៏បានឆែកក្នុងការ៉ុងនោះ ក៏ស្រាប់តែប្រទះឃើញសុទ្ធតែជាថ្នាំញៀនទាំងអស់។
ប្រភពដដែលបានបន្តថា សមត្ថកិច្ច បានពិនិត្យឃើញមានគ្រឿងញៀនចំនួន ១៧០ដុំ ស្មើនឹងប្រហែល ១៧០គីឡូក្រាម។ បន្ទាប់មកក៏នាំមកបញ្ជាការដ្ឋានកងវរការពារព្រំដែន និងបន្តរាយការណ៍ជូនថ្នាក់ដឹងនាំតាមឋានានុក្រម ហើយបានបន្តបញ្ជូនទៅកាន់ស្នងការដ្ឋាននគរបាលខេត្តស្ទឹងត្រែងទាំងយប់តែម្ដង៕
