ក្រុមការងារមនុស្សធម៌ បានជួយជួសជុលផ្លូវលំ ១ខ្សែ ប្រវែង ១៦០០ម៉ែត្រ ដេីម្បីងាយស្រួលក្នុងការធ្វេីដំណេីរ និងដឹកជញ្ជូនផលដំណាំរបស់ប្រជាពលរដ្ឋ រស់នៅភូមិស្រែកណ្ដាល ឃុំត្រពាំងប្រាសាទ ស្រុកត្រពាំងប្រាសាទ
ឧត្តរមានជ័យ ៖ ដោយសារបងប្អូនប្រជាពលរដ្ឋរស់នៅភូមិស្រែកណ្ដាល ឃុំត្រពាំងប្រាសាទ ស្រុកត្រពាំងប្រាសាទ ខេត្តឧត្ដរមានជ័យ មានការលំបាកផ្លូវធ្វើដំណើរ និងដឹកផលដំណាំស្រូវ ដំឡូង និងផលដំណាំផ្សេងៗទៀត ខាងអាជ្ញាធរភូមិស្រែកណ្ដាល និងបងប្អូនពលរដ្ឋ បានស្នើសុំផ្ទាល់មកដល់ ក្រុមការងារមនុស្សធម៌ ឲ្យជួយជួសជុលផ្លូវលំ ១ខ្សែ។
ហើយនៅព្រឹកថ្ងៃទី១៤ ខែវិច្ឆិកា ឆ្នាំ២០២០នេះ ក្រុមការងារមនុស្សធម៌ ដឹកនាំដោយលោក ឡេង ឡៃ ចាងហ្វាងការផ្សាយកាសែតផ្កាយព្រឹក លោក ផែន ដារា ទីប្រឹក្សាកាសែតផ្កាយព្រឹក លោក លី ប៊ុនលាង ចាងហ្វាងការផ្សាយ កាសែតកូននាគអាសុី និងក្រុមការងារ បានចុះទៅដល់ផ្ទាល់ ធ្វើការសហការជាមួយនិងអាជ្ញាធរភូមិស្រែកណ្ដាល និងបងប្អូនប្រជាពលរដ្ឋ ដើម្បីធ្វើការជួសជុលផ្លូវលំ ១ខ្សែ ដែលមមានទទឹង ០៦ម៉ែត្រ បណ្ដោយ ១.៦០០ម៉ែត្រ។ សម្រាប់បងប្អូនប្រជាពលរដ្ឋរស់នៅភូមិស្រែកណ្ដាល បានផ្លូវលំល្អក្នុងការធ្វើដំណើរ ដឹកជញ្ជូនផលដំណាំរបស់ពួកគាត់។
ក្រុមការងារមនុស្សធម៌ ដឹកនាំដោយលោកឡេង ឡៃ បានចំណាយថវិកាជួសជុលផ្លូវលំ ១ខ្សែ អស់ចំនួន ៣.៣៩០០០០រៀល (បីលានសាមសិបប្រាំបួនមុឺនរៀល) បងប្អូនពលរដ្ឋ បានសាទរយ៉ាងខ្លាំង ដល់ក្រុមការងារមនុស្សធម៌ ដែលបានចុះមកជួយជួសជុលផ្លូវលំចំនួន ១ខ្សែនេះ។ បងប្អូនក្នុងភូមិស្រែកណ្ដាល ជូនពរក្រុមការងារមនុស្សធម៌ ឲ្យជួបប្រទះពុទ្ធពរទាំង ៤ប្រការគឺ ៖ អាយុ វណ្ណៈ សុខៈ ពលៈ កំបីឃ្លៀងឃ្លាតឡើយ ៕
