ស្រុកចំនួន ០៣ និងឃុំចំនួន ១០ នៃខេត្តកណ្តាល ទទួលបានអគាររដ្ឋបាលថ្មី ពីក្រសួងមហាផ្ទៃ
ខេត្តកណ្ដាល ៖ សូមជម្រាបថា អគាររដ្ឋបាលថ្មី ដែលបានធ្វើការប្រគល់ទទួលនេះ គឺមានស្រុកមុខកំពូល ស្រុកខ្សាច់កណ្តាល និងស្រុកល្វាឯម ដោយស្រុកនីមួយៗ ទទួលបានអាគារដ្ឋបាលមួយខ្នង និងអគារសាលប្រជុំមួយខ្នង និងអាគាររដ្ឋបាលឃុំចំនួន ១០ ទៀត រួមមាន ស្រុកខ្សាច់កណ្ដាល ទទួលបាន ១ឃុំ គឺឃុំស្វាយរមៀត, ស្រុកមុខកំពូល ទទួលបាន ១ឃុំ គឺឃុំព្រែកអញ្ចាញ, ស្រុកល្វាឯម ទទួលបាន ៤ឃុំ គឺឃុំកោះរះ ឃុំកោះកែវ ឃុំបឹងគ្រំ និងឃុំសំបួរ, ស្រុកកៀនស្វាយ ទទួលបាន ១ឃុំ គឺឃុំភូមិធំ, ស្រុកកោះធំ ទទួលបាន ២ឃុំ គឺឃុំកោះធំ(ខ) និងឃុំព្រែកថ្មី, ស្រុកលើកដែក ទទួលបាន ១ឃុំ គឺឃុំក្អមសំណរ។ គម្រោងសាងសង់អគាររដ្ឋបាលទាំងនេះ គឺជាគម្រោងដែលគាំទ្រដោយធនាគារអភិវឌ្ឍន៍អាស៊ី តាមរយៈក្រសួងមហាផ្ទៃ។
ថ្លែងក្នុងពិធីប្រគល់ទទួលអគាររដ្ឋបាលអាគារសាលប្រជុំនៃស្រុកចំនួន ០៣ និងអាគារដ្ឋបាលឃុំចំនួន ១០ ក្នុងខេត្តកណ្ដាល នៅថ្ងៃទី១៦ ខែមិថុនានេះ ឯកឧត្តម គង់ សោភ័ណ្ឌ អភិបាលខេត្តកណ្ដាល បានបញ្ជាក់ថា ការផ្ដល់សេវារដ្ឋបាលខេត្តកណ្ដាល បច្ចុប្បន្ននេះ បាននឹងកំពុងខិតខំយ៉ាងខ្លាំងក្នុងការកែប្រែឥរិយាបថជាវិជ្ជមាន របស់មន្ត្រីពីអ្នកគ្រប់គ្រងឱ្យទៅជាអ្នកផ្ដល់ និងបម្រើសេវានានា ប្រកបដោយប្រសិទ្ធភាព តម្លាភាព គណនេយ្យភាព ប្រកាន់ខ្ជាប់និងឥរិយាបថទាំងបួនរបស់មន្ត្រីរាជការគឺ ឆន្ទៈម្ចាស់ការ ភក្តីភាព មនសិការវិជ្ជាជីវៈ និងវប្បធម៌សេវារដ្ឋបាលសាធារណៈ ធ្វើយ៉ាងណា រួមសាមគ្គីភាពគ្នាឲ្យសកម្មក្នុងការថែរក្សាសន្តិសុខសណ្តាប់ធ្នាប់សាធារណៈកសាង និងអភិវឌ្ឍន៍ខេត្តឲ្យមានការរីកចំរើនគ្រប់វិស័យ កាត់បន្ថយភាពក្រីក្រ។
ហើយចំពោះការទទួលបាននូវសមិទ្ធិផលថ្មីនៅថ្ងៃនេះ គឺបានបង្ហាញពីការយកចិត្តទុកដាក់របស់ក្រសួងមហាផ្ទៃ ក្នុងការគាំទ្រដល់រដ្ឋបាលថ្នាក់ក្រោមជាតិ និងរដ្ឋបាលថ្នាក់មូលដ្ឋានឲ្យមានអាគារធ្វើការសមរម្យ ឆ្លើយតបនឹងរចនាសម្ព័ន្ធថ្មីដែលទើបបានធ្វើសមារណកម្ម ដើម្បីធានាបានក្នុងការបំរើសេវាសាធារណៈ និងដោះស្រាយបញ្ហាប្រឈមនានារបស់ប្រជាពលរដ្ឋប្រកបដោយប្រសិទ្ធភាព ៕
