ករណីគ្រោះថ្នាក់ចរាចរណ៍ ដោយរថយន្តបុកស្លាកមហាវិថីឈ្នះឈ្នះ នៅខណ្ឌជ្រោយចង្វារ
ភ្នំពេញ ៖ នៅព្រឹកថ្ងៃទី០៤ ខែកក្កដា ឆ្នាំ២០១៩ វេលាម៉ោង០៨:៣០នាទី មានករណីគ្រោះថ្នាក់ចរាចរណ៍មួយកើតឡើង នៅត្រង់ចំណុចផ្លូវជាតិលេខ៦ កែងមហាវិថីឈ្នះឈ្នះ សង្កាត់បាក់ខែង ខណ្ឌជ្រោយចង្វារ។
ហេតុការណ៍នេះ បង្កឡេីងដោយរថយន្តម៉ាកHYUNDAI ពណ៌ស ពាក់ផ្លាកលេខ ភ្នំពេញ 3C-6221 បើកបរដោយឈ្មោះ ផែ ផាត ភេទប្រុស អាយុ៣១ឆ្នាំ ស្នាក់នៅឡឥដ្ឋតាលាងហេង មានទីតាំងស្ថិតនៅភូមិក្តីចាស់ ឃុំរកាកោង ស្រុកមុខកំពូល ខេត្តកណ្តាល បានធ្វើដំណើរតាមបណ្តោយមហាវិថីឈ្នះឈ្នះ ទិសដៅពីលិចទៅកើត លុះមកដល់ចំណុចកើតហេតុខាងលើ រថយន្តបានគេចពីយានផ្សេង ហើយចាប់ហ្វ្រាំងមិនស៊ី ក៏ជ្រុលឡើងលើសួនទៅដើមស្លា និងបុកស្លាកបង្ហាញមហាវិថីឈ្នះឈ្នះតែម្តង។
ក្រោយពេលកើតហេតុ សមត្ថកិច្ចជំនាញបាននាំអ្នកបើកបររថយន្តមកធ្វើតេស្តជាតិស្រវឹង និងតេស្តរកសារធាតុញៀន តែពុំមានសារធាតុទាំងពីរនេះ ក្នុងខ្លួនអ្នកបើកបររថយន្តឡើយ តាមការសន្និដ្ឋានរបស់ផ្នែកជំនាញ គឺរថយន្តខ្វះលក្ខណៈបច្ចេកទេស (ខូចប្រព័ន្ធហ្វ្រាំង)។
ករណីនេះ បណ្តាលឲ្យបែកថ្មស្លាកបង្ហាញមហាវិថីឈ្នះឈ្នះ និងបាក់ដើមស្លា ០១ដើម។ ចំណែកអ្នកបើកបររថយន្ត ឃាត់ខ្លួនបណ្តោះអាសន្ន និងវត្ថុតាង រក្សាទុកនៅការិយាល័យចរាចរណ៍ ដេីម្បីដោះស្រាយតាមនីតិវិធី ៕
