គ្រឿងក្នុងជ្រូកខូចគុណភាពជាងកន្លះតោន ពីប្រទេសថៃចូលមកកម្ពុជា ត្រូវសមត្ថកិច្ចបង្ក្រាបបាន នៅស្រុកអូរជ្រៅ
ខេត្តបន្ទាយមានជ័យ ៖ នៅម៉ោង៤និង៣០នាទីរសៀល ថ្ងៃទី២០ ខែមិថុនា ឆ្នាំ២០១៩ លើកំណាត់ផ្លូវជាតិលេខ៥ ស្ថិតនៅក្នុងភូមិណាកាឆាយ ឃុំកូប ស្រុកអូរជ្រៅ ខេត្តបន្ទាយមានជ័យ កម្លាំងនគរបាលការិយាល័យប្រឆាំងបទល្មើសសេដ្ឋកិច្ចខេត្តបន្ទាយមានជ័យ បានបង្ក្រាបរថយន្តដឹកគ្រឿងក្នុងជ្រូកជាងកន្លះតោន និងឃាត់ខ្លួនអ្នកបើករថយន្ត ០១នាក់ បញ្ជូនទៅកាន់ស្នងការដ្ឋានគរបាលខេត្តបន្ទាយមានជ័យ ដើម្បីត្រួតពិនិត្យ និងចាត់ការតាមផ្លូវច្បាប់។
លោកឧត្តមសេនីយ៍ត្រី ចាប សុផាប្ញទ្ធិ ស្នងការរងទទួលផែនប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្តបន្ទាយមានជ័យ ប្រាប់ឱ្យដឹងថា ការបង្ក្រាបរថយន្តម៉ាក Toyota alphard ពណ៌ស ពាក់ស្លាកលេខ បន្ទាយមានជ័យ 2B-6779 អនុវត្តតាមបទបញ្ជាផ្ទាល់ពីលោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ ដើម្បីទប់ស្កាត់នៃការនាំចូលម្ហូបអាហារខូចគុណភាពខុសច្បាប់ បង្កគ្រោះថ្នាក់សុខភាពប្រជាពលរដ្ឋខ្មែរ។ ក្រោយពីមានប្រជាពលរដ្ឋប្តឹងរាយការណ៍មកថា រថយន្តខាងលើនោះ បានលួចដឹកគ្រឿងក្នុងជ្រូកខូចគុណភាពចេញពីក្រុងប៉ោយប៉ែត ឆ្ពោះទៅរាជធានីភ្នំពេញ។
លោកស្នងការរង ប្រាប់ឱ្យដឹងទៀតថា ការត្រួតពិនិត្យជាក់ស្តែង ការនាំចូលគ្រឿងក្នុងជ្រូកទាំងនោះ គ្មានលិខិតអនុញ្ញាតនាំចូល និងគ្មានការត្រួតពិនិត្យត្រឹមត្រូវពីមន្ត្រីជំនាញនោះឡើយ។ គ្រឿងក្នុងជ្រូកសរុប ១២កេស ស្មើនឹង ៥៧២គីឡូក្រាម ក្នុងនោះមានពោះជ្រូក ២០០គីឡូក្រាម, ត្រចៀកជ្រូក ១៨០គីឡូក្រាម, បេះដូងជ្រូក ១៥០គីឡូក្រាម, ឆ្អឹងជំនីជ្រូក ២២គីឡូក្រាម និងពោះវៀនធំ ២០គីឡូក្រាម។
លោកស្នងការរង បានបន្តទៀតថា បើតាមចម្លើយសារភាពពីអ្នកបើកបររថយន្តឈ្មោះ គូ លាងចិន ភេទប្រុស អាយុ២៨ឆ្នាំ រស់នៅភូមិ២ សង្កាត់កំពង់ស្វាយ ក្រុងសិរីសោភ័ណ ប្រាប់សមត្ថកិច្ចថា រូបគេប្រកបមុខរបរអ្នករត់តាក់ស៊ី ទើបតែស៊ីឈ្នួលដឹកគ្រឿក្នុងជ្រូកលើកទី១ ឱ្យថៅកែនៅភ្នំពេញ ស៊ីឈ្នួលដឹក១កេស ២៥.០០០រៀល ដោយមិនដឹងថាជាគ្រឿងក្នុងជ្រូកមានច្បាប់ ឬអត់ច្បាប់នោះទេ។
លោកស្នងការរងបញ្ជាក់ឱ្យដឹងទៀតថា គ្រឿងក្នុងជ្រូកជាងកន្លះតោននេះ រង់ចាំឱ្យមន្ត្រីជំនាញកាំកុងត្រូលចុះមកធ្វើការត្រួតពិនិត្យ ក្រែងមានការលាយផ្សំនូវសារធាតុគីមី និងសុំគោលការណ៍ពីលោកព្រះរាជអាជ្ញាអមសាលាដំបូងខេត្តបន្ទាយមានជ័យ ដើម្បីយកទៅដុតកំទេចចោល ៕
