RANGE ROVER ចងកំហឹងជាមួយបង្គោលភ្លើង ខ្ទេចមុខ បាក់បង្គោលរាបដល់ដី

ភ្នំពេញ ៖ រថយន្តRANGE ROVER មួយគ្រឿង សង្ស័យអ្នកបើកបរ មានបុណ្យសក្តិខ្ពស់ បើកទាំងស្រវឹង បបោលបុកបង្គោលភ្លើង បាក់រាបដល់ដី ហើយអ្នកអ្នកបរ ត្រូវបានរថយន្តសុីរ៉ែន មកទទួលដឹកជូនចេញពីកន្លែងកើតហេតុ ពលរដ្ឋកុំក្អក កាលពីវេលាម៉ោង២និង៣០នាទីរំលងអធ្រាត្រ ចូលថ្ងៃទី០៨ ខែឧសភា ឆ្នាំ២០១៩ តាមផ្លូវបេតុង បឹងតាម៉ាត ភូមិសំបួរ សង្កាត់ដង្កោ ខណ្ឌដង្កោ ។

រថយន្តបង្កម៉ាក RANGE ROVER ពណ៌ស ពាក់ស្លាកលេខ ភ្នំពេញ 2Q-1278 អ្នកបើកបរមិនស្គាល់ អត្តសញ្ញាណ តែបើពលរដ្ឋនៅកន្លែងកើតហេតុ ថា សង្ស័យមានបណ្តាសក្តិខ្ពស់ហើយមើលទៅ ក្រោយកើតហេតុភ្លាម មានរថយន្តសុីរ៉ែន មកដឹកជូន អ្នកបើកបររូបនោះចេញភ្លែត ទើបពួកគាត់មិនហ៊ាន ខ្លាចធ្លាយពោះ បន្សល់ទុកតែរថយន្តនៅកន្លែងកើតហេតុ ។

តាមពលរដ្ឋបានឲ្យដឹងថា មុនកើតហេតុ គេឃើញរថយន្តបង្កបើកពីលិចទៅកើត តាមផ្លូវបេតុងខាងលើ សង្ស័យទើបចេញពីផឹកសុីកន្លែងណាហើយ ស្រវឹង រេពេញផ្លូវ ដល់ចំណុចខាងលើ ជ្រុលទៅបុកបង្គោលភ្លើង បាក់រាបដល់ដី អ្វីមិននឹកស្មានដល់ ពលរដ្ឋមិនហ៊ានឃាត់ ដោយមានរថយន្តសុីរ៉ែន មកអន្តរាគមន៍ ដឹកអ្នកបើកបរចេញទៅបាត់ ។

ក្រោយកើតហេតុ នគរបាលស្ទូចលើកយករថយន្តខាងលើ ទៅរក្សាទុកនៅការិយាល័យចរាចរណ៍ជើងគោក រងចាំម្ចាស់រថយន្ត ចូលខ្លួនដោះស្រាយពេលក្រោយ ៕