ចោរលួចឡានដ៏ល្បី ត្រូវបានសមត្ថកិច្ចក្របួចជាប់…!

ខេត្តបន្ទាយមានជ័យ៖ ជនសង្ស័យម្នាក់ឃើញរថយន្តគេចតទុកនៅមុខផ្ទះក៏យកដែកស្រួចឆ្កិះស្រាប់តែទ្វារយន្តបើកឃើញសោរនៅជាប់នៅរថយន្តក៏ជិះយកទៅបាត់ក្រោយពីម្ចាស់ឈ្មោះឌី អ៊ុន វាសនា ភេទ ប្រុស អាយុ ២៧ឆ្នាំ មានទៅលំនៅភូមិក្បាលស្ពាន២ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ បានដាក់ពាក្យបណ្តឹងដល់កងរាជអាវុធហត្ថក្រុងប៉ោយប៉ែត ហើយក្រោយពីបានទទួលពាក្យបណ្តឹងរួចក៏សហការជាមួយកម្លាំងជំនាញមូលដ្ឋានកងរាជអាវុធហត្ថក្រុងសិរីសោភ័ណ បានចុះធ្វើការស្រាវជ្រាវឈានដល់ធ្វើការឃាត់ខ្លួនជនសង្ស័យបានម្នាក់នៅវេលាម៉ោង៤ល្ងាច ថ្ងៃទី៣ ខែឧសភា ឆ្នាំ២០១៩នេះ នៅចំណុចផ្លូវជាតិលេខ៥ ស្ថិតនៅភូមិទឹកថ្លា សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ បន្ទាប់ពីធ្វើការឃាត់ខ្លួនហើយកម្លាំងជំនាញបានបញ្ជូនជនសង្ស័យនិងវត្ថុតាងទៅទីបញ្ជាការដ្ឋានកងរាជអាវុធហត្ថខេត្ត ដើម្បីចាត់ការបន្ត។

លោកវរសេនីយ៍ទោ ព្រហ្ម ថេង ប្រធានមន្ទីរយុត្តិធម៌បានប្រាប់អ្នកយកព៍ត័មានឲ្យដឹងថា ជនសង្ស័យមាន ឈ្មោះ ត្រឹង រតនា ភេទ ប្រុស អាយុ ២៤ឆ្នាំ សព្វថ្ងៃស្នាក់នៅភូមិក្បាលស្ពាន២ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័។

លោកវរសេនីយ៍ទោ ព្រហ្ម ថេងបានបញ្ជាក់ឲ្យដឹងទៀតថា នៅថ្ងៃកើតហេតុជនសង្ស័យបានឃើញរថយន្ត ពណ៌ក្រហម ១គ្រឿងពាក់ស្លាកលេខ 2A-0943ទុកនៅមុខផ្ទះ ពេលនោះខ្លួនបានលួចឆ្កឹះគន្លឹះទ្វាររបូតចេញមក ហើយខ្លួនក៏ បានបើកទ្វាររថយន្តចូលទៅខាងក្នុង ក៏ឃើញមានកូនសោរនៅក្នុងរថយន្តស្រាប់ក៏បញ្ឆេះរថយន្តបើកចេញ មកដើរលេងក្នុងក្រុងប៉ោយប៉ែត និងបានចូលលេងក្នុងក្លិបទៀត ក្រោយពីដើរលេងរួច ពេលទាបភ្លឺ ខ្លួនក៏បានបើករថយន្តមកបបួលមិត្តភ័ក្តិ ២នាក់ទៀតមកដើរលេងជាមួយ ពេលនោះមិត្តភ័ក្ដិបានសួរថា បានរថយន្តមកពីណា ហើយខ្លួនប្រាប់ថា ជារបស់ម្តាយខ្លួនក្រោយមកទៀតត្រូវកំលាំងកងរាជអាវុធហត្ថឃាត់ខ្លួនតែម្តង។

ផ្អែកលើចម្លើយសារភាពរបស់ជនសង្ស័យឃើញថាមានតម្រុយពិរុទ្ធភាពនៃបទល្មើសយ៉ាងជាក់លាក់ កម្លាំងជំនាញកងរាជអាវុធហត្ថខេត្ត បានកសាងសំណុំរឿងបញ្ជូនជនសង្ស័យ រួមជាមួយនឹងវត្ថុតាង ទៅតុលាការដើម្បី ចាត់ការទៅតាមច្បាប់ ចំណែករថយន្តត្រូវបានកងរាជអាវុធហត្តប្រគល់ ជូនទៅម្ចាស់ ដើម វិញហើយផងដែរ។