ជនសង្ស័យវ័យចាស់ប្រុសស្រីទាំងពីរអ្នក ត្រូវសមត្ថកិច្ចឃាត់ខ្លួនភ្លាមៗ ខណៈចរាចរណ៍សារធាតុញៀនមួយកញ្ចប់ធំ

ស្ទឹងត្រែង៖ កម្លាំងនគរបាលប្រឆាំងបទល្មើសគ្រឿងញៀនរបស់ស្នងការនគរបាលខេត្តស្ទឹងត្រែងបង្ក្រាបការជួញដូរគ្រឿងញៀនមួយករណី ដោយបានចាប់ខ្លួនជនសង្ស័យប្រុស-ស្រីពីរនាក់និងដកហូតបានថ្នាំញៀនមួយកញ្ចប់ធំ ប្រតិបត្តិការខាងលើនេះបានធ្វើឡើងកាលពីថ្ងៃទី២ ខែឧសភា ឆ្នាំ២០១៩។ លើកំណាត់ផ្លូជាតិលេខ៩ ត្រង់ចំណុច ផ្លូវបំបែកចូល ទឹកធ្លាក់ជ្រោះសុភមិត្ត ទៅឃុំព្រះរំកិល ស្ថិតក្នុងភូមិសំអាង ឃុំសំអាង ស្រុកថាឡាបរិវ៉ាត់ ខេត្តស្ទឹងត្រែង។

ហើយនៅព្រឹកថ្ងៃទី៣នេះ សមត្ថកិច្ចទើបធ្វើការបង្ហាញមុខជនសង្ស័យ និងហែកកញ្ចប់សំណាកថ្នាំញៀន រួចថ្លឹងនៅមុខជនសង្ស័យទាំងពីរអ្នក នឹងនៅចំពោះមុខលោក គឹម ហុងសាន ព្រះរាជអាជ្ញារង នៃអយ្យការអមសាលាដំបូងខេត្តស្ទឹងត្រែង។ នគរបាលប្រឆាំងគ្រឿងញៀនបានបញ្ជាក់ថា ជនសង្ស័យទាំងពីរនាក់ដែលឃាត់ខ្លួនបានទី១-ឈ្មោះសុំ សាង ជនជាតិខ្មែរ ភេទប្រុស អាយុ ៧០ឆ្នាំ រស់នៅឃុំព្រះរំកិល ស្រុកថាឡាបរិវ៉ាត់ ខេត្តស្ទឹងត្រែង ទី២-ឈ្មោះ មុត សៃ ភេទស្រី អាយុ ៦០ឆ្នាំ ជនជាតិខែ្មរ រស់នៅឃុំព្រះរំកិល ស្រុកថាឡាបរិវ៉ាត់។

ចំណែកសារធាតុញៀនដែលរឹបអូសបាន មានទម្ងន់៩៩៤,៥ក្រាម ស្មើនិងជិតមួយគីឡូក្រាម ជាប្រភេទថ្មាំម៉េតំហ្វេតាមីនអាយ ឬហៅថា (ម៉ាទឹកកក)។ បច្ចុប្បន្ន ជនសង្ស័យវ័យចំណាស់ទាំងពីរកំពុងស្ថិតក្រោមការឃុំខ្លូននៅស្នងការដ្ឋាននគរបាលខេត្តស្ទឹងត្រែងដើម្បីសាក់សួរស្រាវជ្រាវរកអ្នកពាក់ព័ន្ធ និងកសាងសំណុំរឿងបញ្ចូនខ្លួនទៅកាន់តុលាការនៅព្រឹកថ្ងៃទី៤ស្អែកនេះ ចាត់ការទៅតាមនីតិវិធី៕