ជិះម៉ូតូមិនប្រយ័ត្នជ្រុលចង្កូតបុករថយន្តពីមុខរបួសធ្ងន់២នាក់ នៅស្រុកលំផាត់

ខេត្តរតនគិរី÷ ករណីគ្រោះថ្នាក់ចរាចរណ៍បុរស២នាក់ជិះម៉ូតូទៅបុករថយន្តមួយគ្រឿងខណ:បើកបរក្នុងទិសដៅបញ្ច្រាសគ្នាពីជើងទៅត្បូង យ៉ាងពេញទំហឹងបណ្តាលឲ្យដួលរណូករណែលពេញផ្លូវរងរបួសធ្ងន់ធ្ងរ។

ករណីគ្រោះថ្នាក់ចរាចរណ៍បានកើតឡើងកាលពីវេលាម៉ោង១១និង ០០នាទីព្រឹក ថ្ងៃពុធ ៨កើត ខែផល្គុន ឆ្នាំច សំរឹទ្ធិស័ក ព.ស២៥៦២ ត្រូវនិងថ្ងៃទី១៣ ខែមីនា ឆ្នាំ២០១៩ តាមបណ្តោយផ្លូវជាតិលេខ៧៦ នៅចំណុចផ្លូវបំបែកផ្ទះឈ្មោះ ហួ ត្រង់បង្គោលគីឡូម៉ែត្រលេខ ២៨២-២៨៣ ស្ថិតក្នុងភូមិព្រួក ឃុំបាតាង ស្រុកលំផាត់។

សមត្ថកិច្ចនគរបាលស្រុកលំផាត់បានឲ្យដឹងថា អ្នកជិះម៉ូតូឈ្មោះ វរះ ភេទប្រុស អាយុ២១ឆ្នាំ ជនជាតិខ្មែរ មុខរបរកសិករ មានទីលំនៅភូមិកាទៀង ឃុំល្បាំង១ ស្រុកលំផាត់ ខេត្តរតនគិរី រងរបួសធ្ងន់ បើកបរម៉ូតូមួយគ្រឿងម៉ាកហុងដាឌ្រីម សេ១២៥ ស៊េរីឆ្នាំ២០១៤ ពណ៌ខ្មៅ ពាក់ស្លាកលេខ1B-2011អ្នករួមដំណើរឈ្មោះ លី រិទ្ធី ភេទប្រុស អាយុ៥៥ឆ្នាំ ជនជាតិខ្មែរ មុខរបរកសិករ រងរបួសធ្ងន់ មានទីលំនៅភូមិបាតាង ស្រុកលំផាត់។

សមត្ថកិច្ចនគរបាលបានបន្តថា រថយន្តមួយគ្រឿងម៉ាក តូយូតាហ្វ័រណ័រ ពណ៌ខ្មៅ ពាក់ស្លាកលេខភ្នំពេញ2J-5065 អ្នកបើកបរមិនត្រូវបានស្គាល់អត្តសញាណ ក្រោយកើតហេតុរត់គេចខ្លួនបាត់ បន្សល់ទុករថយន្តនៅកន្លែងកើតហេតុ។
បើកបរពីជើងទៅត្បូងដល់ត្រង់ចំណុចកើតហេតុខាងលើស្រាប់តែម៉ូតូបានជ្រុលចង្កូតទៅបុករថយន្តពីមុខតែម្តង។
ហើយរថយន្តបានរេចង្កូតទៅបុកនិងដើមខុបនៅចិញើមផ្លូវទៅមុខលែងរួច។

ក្រោយពេលកើតហេតុកម្លាំងប៉ុស្តិ៍រដ្ឋបាលឃុំបាតាង និងជំនាញចុះមកកន្លែងកើតហេតុ ធ្វើការវាស់វែងរឹបអូសយកមធ្យោបាយទាំង២គ្រឿងទៅរក្សាទុកនៅអធិការនគរបាលស្រុកលំផាត់ដើម្បីរង់ចាំធ្វើការដោះស្រាយនៅពេលក្រោយ។

ដោយឡែកអ្នករងរបួសធ្ងន់ត្រូវបានសាច់ញាតិដឹកបញ្ជូនទៅព្យាបាលនៅមន្ទីពេទ្យបង្អែកខេត្តភ្លាមៗផងដែរ៕ដោយ សាវ័ន