យោធាផ្កាយ៣ ម្នាក់ ទះកំផ្លៀងនារីជាអ្នកចំរៀង ៣កំផ្លៀង ព្រោះខឹងមិនទៅដេកជាមួយខ្លួន
ភ្នំពេញ ៖ កាលពីយប់ថ្ងៃទី២៧ ខែកុម្ភៈ ឆ្នាំ២០១៩ មានហេតុការណ៍ភ្ញាក់ផ្អេីលមួយបានកេីតឡេីង គឺមានមន្ត្រីយោធាផ្កាយ៣ ម្នាក់ បានទះកំផ្លៀងនារីម្នាក់ ដែលជាអ្នកចំរៀងនៅក្នុងភោជនីយដ្ឋាន« បឹងមាស» ចំនួន ៣កំផ្លៀង ដែលស្ថិតនៅតាមបណ្តោយផ្លូវជាតិលេខ៦ ក្នុងសង្កាត់ជ្រោយចង្វា ខណ្ឌជ្រោយចង្វា។
ជនរងគ្រោះបានឲ្យដឹងថា មុនពេលកេីតហេតុ នាងបានឃេីញមនុស្សប្រុសស្រីជាង ១០នាក់ បានចូលមកផឹកស៊ីក្នុងភោជនីយដ្ឋានខាងលេី។ បន្ទាប់មក បុរសដែលអួតខ្លួនថា ជាមន្ត្រីយោធាពាក់ផ្កាយ៣ នោះ បានហៅរូបនាង ដែលកំពុងច្រៀងនៅលើឆាក ឲ្យចុះមករាំកំដរ ហេីយថា ចាំឲ្យលុយធីប ២០ដុល្លា។
នៅពេលកំពុងផឹកស៊ី បុរសដែលអួតខ្លួនថា ជាមន្ត្រីយោធាពាក់ផ្កាយ៣ នោះ បានបបួលនាងទៅដេក ហេីយនាងបដិសេធ ដោយនិយាយថែមថា នាងលក់តែសម្លេងទេ មិនលក់ខ្លួនឡើយ ភ្លាមនោះ ដោយឮសម្តីនាងនិយាយបែបនេះ ធ្វើឲ្យជនដៃដល់ខឹង បានទះកំផ្លៀងមកលើរូបនាងចំនួន ៣កំផ្លៀង បន្ទាប់មកក៏ប្រញាប់ប្រញាល់បើករថយន្តចេញពីកន្លែងហេតុ។ ហេីយបុរសដែលអួតខ្លួនថា ជាមន្ត្រីយោធាពាក់ផ្កាយ៣ នោះ ត្រូវបានគេដឹងថា បើករថយន្តម៉ាស្តារ ពណ៌ខ្មៅ ០១គ្រឿង ពាក់ស្លាកលេខ ខេមរភូមិន្ទ02 / 2-1215។
បច្ចុប្បន្ន នារីរងគ្រោះ បានដាក់ពាក្យបណ្តឹងនៅប៉ុស្តិ៍នគរបាលសង្កាត់ជ្រោយចង្វា ដេីម្បីឲ្យសមត្ថកិច្ចជួយស្វែងរកជនដៃដល់ ដែលអួតខ្លួនជាមន្រ្តីយោធាផ្កា៣ យកមកដោះស្រាយតាមនីតិវិធី ៕
