ផ្ទះបើកល្បែងសុីសងចាក់បាល់តាមប្រព័ន្ធអេឡិចត្រូនិចមួយកន្លែង នៅផ្លូវ៤៧៤ បឹងត្របែក អាជ្ញាធរខណ្ឌចំការមន មិនហ៊ានបង្ក្រាប
ភ្នំពេញ ៖ ផ្ទះបើកល្បែងសុីសងចាក់បាល់ តាមប្រព័ន្ធអេឡិចត្រនិចមួយកន្លែង បើកលេងយូរឆ្នាំមកហើយ ដែលមានទីតាំងនៅផ្លូវ៤៧៤ បឹងត្របែក សង្កាត់បឹងត្របែក ខណ្ឌចំការមន រាជធានីភ្នំពេញ ខាងអាជ្ញាធរ និងសមត្តកិច្ចមិនហ៊ានបង្ក្រាប។
បើតាមសម្ដីរបស់ពលរដ្ឋ រស់នៅក្បែរទីតាំងល្បែងសុីសងខាងលើ បានលួចខ្សិបប្រាប់ភ្នាក់ងារសារព័ត៌មានយើងថា ទីតាំងបើកល្បែងសុីសងចាក់បាល់តាមប្រព័ន្ធអេឡិចត្រនិចខាងលើ បើកលេងយូរឆ្នាំមកហើយ កាក់កបខ្លាំងណាស់ ពួកគាត់មិនដែលឃើញខាងអាជ្ញាធរ និងសមត្តកិច្ចមូលដ្ឋានខណ្ឌចំការមន ធ្វើការចុះមកត្រួតពិនិត្យ និងមានចំណាត់ទាល់តែសោះ ពលរដ្ឋសង្ស័យថា ប្រហែលត្រូវរ៉ូវគ្នាហើយ បើមិនមានការបើកភ្លើងខៀវ ពីខាងអាជ្ញាធរ សមត្តកិច្ចមូលដ្ឋាននោះទេ គឺមិនអាចបើកលេងបានយ៉ាងរលូនបែបនេះទេ ឬមួយខ្លាចអំណាចឥទ្ធិពលម្ចាស់បនល្បែងខាងលើនោះ។
ពលរដ្ឋនិយាយប្រាប់បន្តទៀតថា ល្បែងគ្រប់ប្រភេទនៅទឹកដីខណ្ឌចំការមន បើកលេងមានសេចក្ដីសុខយ៉ាងខ្លាំង ពួកគាត់មិនដែលឃើញលោក ព្រុំ សំខាន់ អភិបាលនៃគណៈអភិបាលខណ្ឌចំការមន និងលោកអធិការខណ្ឌចំការមន ចុះប្រតិបត្តិការបង្ក្រាប ទៅលើល្បែងគ្រប់ប្រភេទនោះទេ នេះជាភាពអសកម្មយ៉ាងខ្លាំង ចំពោះមន្ត្រីជំនាញ និងសមត្តកិច្ចខណ្ឌចំការមន។
ពលរដ្ឋសង្ឃឹមយ៉ាងមុតម៊ាំថា ឯកឧត្ដម ស ថេត ស្នងការរាជធានីភ្នំពេញ និងជាអគ្គស្នងការរងនគរបាលជាតិ មិនទុកឲ្យកើតមាននៅល្បែងសុីសងគ្រប់ប្រភេទ ក្នុងរាជធានីភ្នំពេញទៀតទេ នេះជាកណ្ដាប់ដៃក្ដៅ ដែលពលរដ្ឋចង់បាន ដូចការចុះបង្ក្រាបថ្មីៗ នៅមជ្ឈមណ្ឌលរ៉ុកអញ្ចឹង ៕
