យុវជន២នាក់ ជិះម៉ូតូបោះពួយយ៉ាងលឿនជ្រុលចង្កូតបុកម៉ូតូស្ត្រីម្នាក់របួសធ្ងន់

រតនគិរី÷ ម៉ូតូហុងដាឌ្រីម២គ្រឿងពន្លះគ្នានៅកណ្តាលប្រលានយន្តហោះចាស់យ៉ាងពេញទំហឹងបណ្តាលឲ្យមនុស្សប្រុសស្រី៣នាក់បានរងរបួសធ្ងន់និងស្រាល។

ករណីគ្រោះថ្នាក់ចរាចរណ៍នេះបានកើតឡើងកាលពីវេលាម៉ោង៤និង ៤០នាទីល្ងាចថ្ងៃព្រហស្បតិ៍ ៥កើត ខែបុស្ស ឆ្នាំច សំរឹទ្ធិស័ក ព.ស ២៥៦២ ត្រូវនិងថ្ងៃទី១០ ខែមករា ឆ្នាំ២០១៩ ត្រង់ចំណុចប្រលានយន្តហោះចាស់ ស្ថិតក្នុងភូមិ៧មករា សង្កាត់ឡាបានសៀក ក្រុងបានលុង។

បើតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេបានឃើញស្រីម្នាក់ជិះម៉ូតូក្នុងទិសដៅពីកើតមកលិច ខណ: មកដល់ត្រង់ចំណុចកើតហេតុក៏មានម៉ូតូមួយគ្រឿងជិះក្នុងល្បឿនយ៉ាងលឿនពីត្បូងទៅជើងបំម្រុងបត់ទៅទិសខាងលិចស្រាប់តែជ្រុលចង្កូតទៅបុកស្ត្រីម្នាក់កំពុងធ្វើចរាចរណ៍បណ្តាលឲ្យរងរបួសធ្ងន់ទាំងសងខាង។

មន្ត្រីនគរបាលប៉ុស្តិ៍ឡាបានសៀកបានឲ្យដឹងថា ស្ត្រីរងគ្រោះមានឈ្មោះ សម្ភស្ស អាយុ៣១ឆ្នាំ ជនជាតិខ្មែរ មានទីលំនៅភូមិ/ឃុំកើតហេតុខាងលើ របួសធ្ងន់។ ជិះម៉ូតូ១គ្រឿងម៉ាកហុងដាឌ្រីម សេ១២៥ ស៊េរីឆ្នាំ២០១៩ ពណ៌ខ្មៅ ពាក់ស្លាកលេខ រដ្ឋ ១៤ ១-០៣៤៩។

រីឯម៉ូតូ១គ្រឿងទៀតម៉ាកហុងដាឌ្រីម សេ១២៥ ស៊េរីឆ្នាំ២០១៦ ពណ៌ខ្មៅ ពាក់ស្លាកលេខ រតនគិរី ១A-៦៦៩៤ អ្នកបើកបរមានឈ្មោះ ចែម សុវត្តី ភេទប្រុស អាយុ១៥ឆ្នាំ ជនជាតិខ្មែរ ជាសិស្ស មានទីលំនៅភូមិល្អឺន ឃុំអូរជុំ ស្រុកអូរជុំ ខេត្តរតនគិរី របួសស្រាល។

អ្នករួមដំណើរឈ្មោះ លី ណារិទ្ធ ភេទប្រុស អាយុ១៥ឆ្នាំ ជនជាតិឥស្លាម មានទីលំនៅភូមិ/ឃុំកើតហេតុខាងលើ របួសធ្ងន់បែកក្បាលហូឈាមពេញខ្លួន។ចំណែកម៉ូតូទាំង២គ្រឿងបានរងការខូចខាតទាំងសងខាង។

ក្រោយកើតហេតុអ្នករងរបួសទាំងសងខាងត្រូវបានសាច់ញាតិដឹកបញ្ជូនទៅមន្ទីរពេទ្យបង្អែកខេត្តដើម្បីព្យាបាលរបួស។

ដោយឡែកមធ្យោបាយទាំង២គ្រឿងត្រូវបាននគរបាលចរាចរណ៍រឹបអូសយកមករក្សាទុកនៅការិយាយចរាចរណ៍ខេត្តដើម្បីរងចាំធ្វើការដោះស្រាយនៅពេលក្រោយ៕ដោយ សាវ័ន