ជិះម៉ូតូ បុកអ្នកដើរថ្មើរជើងពីក្រោយ របួសធ្ងន់ស្រាលទាំងសងខាង

ខេត្តរតនគិរី÷ យុវជន២នាក់ ម្នាក់របួសធ្ងន់ និងម្នាក់ទៀតរបួសស្រាល ក្រោយជួបគ្រោះថ្នាក់ចរាចរណ៍រវាងម៉ូតូបើកបុកអ្នកថ្មើរជើងពីក្រោយ​ កាលពីវេលាម៉ោង៧និង៣០នាទីថ្ងៃពុធ ១២កើត ខែមិគសិរ ឆ្នាំច សំរឹទ្ធិស័ក ព.ស២៥៦២ ត្រូវនិងថ្ងៃទី១៩ ខែធ្នូ ឆ្នាំ២០១៨ ស្ថិតនៅត្រង់ ចំណុចភូមិ១ ឃុំត្រពាំងច្រេស ស្រុកកូនមុំ ខេត្តរតនគិរី។

នគរបាលស្រុកកូនមុំបានឲ្យដឹងថា ម៉ូតូបង្កមួយគ្រឿងម៉ាក Revo ពណ៌ក្រហម អត់ស្លាកលេខ អ្នកបើកបរឈ្មោះ ញ៉ែម រស្មី ភេទប្រុស អាយុ២៥ឆ្នាំ ជនជាតិខ្មែរ មានទីលំនៅភូមិ៣ ឃុំត្រពាំងច្រេស ស្រុកកូនមុំ ខេត្តរនគីរី។ បានបុកអ្នកដើរពីក្រោយ​ឈ្មោះ គឺម ឌី ភេទប្រុស អាយុ២០ឆ្នាំ ជនជាតិខ្មែរ មុខរបរកសិករ រស់នៅភូមិ/ឃុំកើតហេតុខាងលើ របួសស្រាល រីឯអ្នកបើកបរម៉ូតូ រងរបួសធ្ងន់ ត្រូវបានដឹកបញ្ជូ​នទៅព្យាបាលពេទ្យបង្អែកខេត្ត។

បន្ទាប់មកសមត្ថកិច្ចមូលដ្ឋានបានយកម៉ូតូទៅរក្សាទុកនៅប៉ុស្តិ៍រដ្ឋបាលឃុំត្រពាំងច្រេសដើម្បីចាត់ការតាមនិតិវិធី៕ដោយ សាវ័ន