កម្លាំងនគរបាលខណ្ឌដូនពេញ បង្ក្រាបមុខសញ្ញាជួញដូរគ្រឿងញៀនបានម្នាក់ និងដកហូតថ្នាំញៀនចំនួន ២កញ្ចប់ធំ

ភ្នំពេញ៖កម្លាំងនគរបាលខណ្ឌដូនពេញ បានបើកប្រតិបត្តិការចុះបង្ក្រាបទីតាំងជួញដូរគ្រឿងញៀន ដោយធ្វើការឃាត់ខ្លួនបានជនសង្ស័យម្នាក់ និងដកហូតបានថ្នាំញៀនចំនួន ២កញ្ចប់ធំ។

ប្រតិបត្តិការចុះបង្ក្រាបខាងលើនេះគឺធ្វើឡើងកាលពីវេលាម៉ោង ៣និង៣០នាទីរសៀល ថ្ងៃទី២៨ ខែវិច្ឆិកា ឆ្នាំ២០១៨ ដែលស្ថិតនៅតាមបណ្តោយផ្លូវរថភ្លើង ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។

លោក ម៉ៅ ចាន់ថុន អធិការរងផ្នែកស្រាវជ្រាវបង្ក្រាប នៃអធិការខណ្ឌដូនពេញ បានប្រាប់ឲ្យដឹងថា ប្រតិបត្តិការខាងលើនេះ គឺកម្លាំងនគរបាលខណ្ឌដូនពេញ បានធ្វើការស្រាវជ្រាវរហូតឈានទៅដល់ការកំណត់បាននូវមុខសញ្ញាជួញដូរគ្រឿងញៀនដ៏សកម្មម្នាក់ ដោយធ្វើការឃាត់ខ្លួន និងដកហូតបានថ្នាំញៀនចំនួន ២កញ្ចប់ធំ និងថង់ផ្លាស់ស្ទិចមួយចំនួន។

លោក ម៉ៅ ចាន់ថុន បានបន្តថា ជនសង្ស័យខាងលើមានឈ្មោះ តារា ចាន់ ភេទប្រុស អាយុ ២៥ឆ្នាំ មុខរបរ មុខរបររើសអេតចាយ មានទីលំនៅនៅសង្កាត់ទឹកថ្លា ខណ្ឌសែនសុខ រាជធានីភ្នំពេញ។

ក្រោយមកកម្លាំងនគរបាលខណ្ឌដូនពេញ បាននាំជនសង្ស័យខាងលើមកអធិការដ្ឋាននគរបាលខណ្ឌ ដើម្បីធ្វើការសាកសួរ។

បច្ចុប្បន្នជនសង្ស័យខាងលើ រួមជាមួយនឹងវត្ថុតាង ត្រូវសមត្ថកិច្ចឃុំខ្លួនជាបណ្ដោះអាសន្ន នៅអធិការដ្ឋាននគរបាលខណ្ឌដូនពេញ ដើម្បីកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ដើម្បីផ្តន្ទាទោសតាមច្បាប់៕