ប៉ូលិស វាយខ្នោះជនសង្ស័យខ្មែរ-វៀតណាម២នាក់ ដកហូតថ្នាំញៀនជិត៦០កញ្ចប់

ខេត្តរតនគិរី÷ ជនសង្ស័យ២នាក់ ត្រូវបាន​សមត្ថកិច្ចនគរបាលក្រុងបានលុង ធ្វើការឃាត់ខ្លួនបានជាបន្ត​បន្ទាប់ កាលពីវេលាម៉ោង៣រសៀលថ្ងៃព្រហស្បតិ៍ ខែកត្តិក ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី៨ ខែវិច្ឆិកា ឆ្នាំ២០១៨ នៅចំណុចខាងកើតផ្សារបានលុង ស្ថិតក្នុងភូមិជ័យជំនះ សង្កាត់ឡាបានសៀក ក្រុងបានលុង ខេត្តរតនគិរី ដោយដកហូតថ្នាំញៀនជាច្រើនកញ្ចប់។

មន្ត្រីនគរបាលក្រុងបានលុង បានឲ្យដឹងថា ដំបូងឡើង កម្លាំង​ជំនាញ បានប្រើ​វិធានញុះញង់ ដោយ​ឃាត់ខ្លួនជនសង្ស័យម្នាក់ ដកហូតថ្នាំ​ញៀន១កញ្ចប់ ដោយមានការបញ្ជាផ្ទាល់ពីលោក ឧត្ដមសេនីយ៍ត្រី វ៉ាន់ សង្វាត់ ស្នងការរងផែនការងារប្រឆាំងបទល្មើស កម្លាំងជំនាញបានធ្វើការសាកសួរ រួចបន្តទៅឃាត់ខ្លួនជនសង្ស័យម្នាក់ទៀត ដែលមានទីលំនៅក្រោយផ្ទះលោកសាយ សេង នៅខាងកើតផ្សារបានលុង ស្ថិតក្នុងភូមិជ័យជំនះ សង្កាត់ឡាបានសៀក ក្រុងបានលុង ខេត្តរតនគិរី ដោយមានការសម្របសម្រួលពីលោក រ៉ាបូ រ៉ាន់ឌី ព្រះរាជអជ្ញារងអមសាលាដំបូងខេត្តរតនគិរី បានធ្វើការឆែកឆេររកឃើញម្សៅក្រាមសថ្លាសង្ស័យសារធាតុញៀនចំនួន៥៧កញ្ចប់ទៀត។

មន្ត្រីនគរបាលបន្តថា ជនសង្ស័យ ដែលត្រូវឃាត់ខ្លួន ទី​១.ឈ្មោះ ចាំង ត្រា ភេទប្រុស អាយុ១៦ឆ្នាំ ជនជាតិវៀតណាម។ ២. ឈ្មោះពៅ ជា ភេទប្រុស អាយុ៥៤ឆ្នាំ ជនជាតិខ្មែរ។ ក្រោយឃាត់ខ្លួន សមត្ថកិច្ចបានធ្វើតេស្តទឹកនោម លទ្ធផលម្នាក់ជាប់សារធាតុញៀនក្នុងខ្លួន និងម្នាក់ទៀតគ្មាន។

ក្នុងនោះសមត្ថកិច្ចដកហូតវត្ថុតាងរួមមាន ៖ -ម្សៅក្រាមសថ្លាសង្ស័យសារធាតុញៀនចំនួន៥៨កញ្ចប់ទម្ងន់១៣.៩៨ក្រាមទាំងសំបកថង់ -ទូរស័ព្ទ១គ្រឿង -លុយខ្មែរ១៨,០០០៛។

បច្ចុប្បន្នជនសង្ស័យ រួមទាំងវត្ថុតាង បានឃាត់និងរក្សាទុកបណ្ដោះអាសន្ននៅការិយាល័យជំនាញ ដើម្បីកសាងសំណុំរឿងបញ្ជូនទៅអយ្យការអមសាលាដំបូងខេត្តចាត់ការតាមនិតិវិធីច្បាប់៕