សិស្សវិទ្យាល័យច្បារអំពៅ២នាក់ រៀនយូរៗបែកគំនិតចេញឆក់ទូរស័ព្ទ
រាជធានីភ្នំពេញ ៖ យុវសិស្ស២នាក់ដែលជាំជនសង្ស័យ បានជិះម៉ូតូធ្វើសកម្មភាពឆក់ទូរស័ព្ទ ជនបរទេសបានសម្រេច តែត្រូវបានជនជនរងគ្រោះជាជនជាតិចិនចាប់កន្ទុយម៉ូតូបាន។ ហេតុការណ៍នេះបានកើតឡើង នៅវេលាម៉ោង១ និង០៥នាទី ថ្ងៃទី២២ ខែមិថុនា ឆ្នាំ២០១៨ នៅតាមបណ្តោយផ្លូវឡើងស្ពានហង្ស ស្ថិតក្នុងសង្កាត់ទន្លេបាសាក់ ខណ្ឌចម្ការមន រាជធានីភ្នំពេញ។ ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ មានជនបរទេសមួយក្រុម (ជនជាតិចិន) មានស្រីមានប្រុសខ្លះស្ពាយកាបូបខ្លះកាន់ទូរស័ព្ទ បានចេញពីភោជនីយដ្ឋានដើរថ្មើជើង ធ្វើដំណើរតាមបណ្តោយផ្លូវខាងលើ បម្រុងនឹងឡើងរថយន្ត។
ភ្លាមនោះស្រាប់តែលេចមុខជនសង្ស័យ២នាក់ខាងលើជិះម៉ូតូមកពីក្រោយបានធ្វើសកម្មភាពឆក់ទូរស័ព្ទបានសម្រេច រួចប្រឹងបើកគេចខ្លួន តែលទ្ធផលទទួលបាន គឺត្រូវបានជនជាតិចិនទាំងនោះចាប់បានកន្ទុយម៉ូតូ បណ្ដាលឲ្យដួលម៉ូតូ ផ្អើលឆោរឡោដល់ប្រជាពលរដ្ឋចាប់បានទាំង២នាក់តែម្តង។ សមត្ថកិច្ចបានឲ្យដឹងថា ជនសង្ស័យទាំង២នាក់ដែលសមត្ថកិច្ចឃាត់ខ្លួនបាន មានឈ្មោះទី១ ប៉ា សុភា អាយុ១៦ឆ្នាំ មុខរបរសិស្សសាលាច្បារអំពៅ និងទី២ឈ្មោះ អៀង រតនា អាយុ១៦ឆ្នាំ សិស្សសាលាច្បារអំពៅ។
ជនសង្ស័យទាំង២នាក់នេះ ស្នាក់នៅម្តុំច្បារអំពៅ ជិះម៉ូតូម៉ាក់ហុងដាឌ្រីម ស៊េរីឆ្នាំ២០១៥ ពណ៌ខ្មៅ ដែលមានស្លាកលេខភ្នំពេញ 1DD-2449 រីឯទូរស័ព្ទឆក់បានសម្រេចនោះ ម៉ាក IPhone 6Plus ពណ៌ស បណ្តាលឲ្យបែកអេក្រង់។ ជនសង្ស័យទាំង២នាក់ខាងលើនេះ បានឆ្លើយសារភាពនៅចំពោះមុខសមត្ថកិច្ចថា ពួកគេពិតជាបានធ្វើសកម្មភាពឆក់ទូរស័ព្ទដៃ របស់ជនជាតិចិនទាំងនោះ ពិតប្រាកដមែន ក្រោយពេលធ្វើការសាកសួររួច សមត្ថកិច្ចបានកសាង សំណុំរឿងដើម្បីបញ្ជូនទៅអធិការដ្ឋាននគរបាលខណ្ឌចម្ការមន៕
