អាវុធហត្ថខណ្ឌមានជ័យ បើកប្រតិបត្តិការចុះបង្ក្រាបគ្រឿងញៀន ២ទីតាំង ឃាត់ខ្លួនបានចំនួន ១០នាក់
ភ្នំពេញ ៖ ក្រោយពីទទួលព័ត៌មានពីប្រជាពលរដ្ឋរាយការណ៍អំពីទីតាំងដែលក្រុមក្មេងស្ទាវពពាក់ពពួនគ្នាប្រើប្រាស់គ្រឿងញៀនយ៉ាងសប្បាយអើងហើង និងពេលខ្លះអាចបែកគំនិតរហូតប្រព្រឹត្តិនូវបទល្មើសលួច ឆក់ ប្លន់ និងសកម្មភាពអសន្តិសុខផ្សេងៗជាដើម ដើម្បីយកលុយមកបំពេញចំណង់ចិត្តខ្លួនក្នុងការប្រើប្រាស់គ្រឿងញៀននេះផងដែរ ទើបកម្លាំងអាវុធហត្ថខណ្ឌមានជ័យ សហការជាមួយនិងការិយាល័យ បទល្មើសគ្រឿងញៀន នៃកងរាជអាវុធហត្ថរាជធានីភ្នំពេញ បានបើកប្រតិបត្តិការ ធ្វើការចុះបង្ក្រាប ២ទីតាំងបន្តបន្ទាប់គ្នា ដោយឃាត់ខ្លួនបានចំនួន ១០នាក់ និងរកឃើញរួមទាំងវត្ថុតាង ថ្នាំញៀន ចំនួន១៥ កញ្ចប់ផងដែរ។
ប្រតិបត្តិការបង្ក្រាបគ្រឿងញៀនទាំង២ទីតាំងនេះ ធ្វើឡើងនៅវេលាម៉ោង០៩:៣០នាទីព្រឹក ថ្ងៃ៨កើត ខែភទ្របទ ឆ្នាំច សំរឹទ្ធិស័ក ព.ស ២៥៦២ ត្រូវនិងថ្ងៃទី១៧ ខែកញ្ញា ឆ្នាំ ២០១៨ ដោយទទួលបាន ពត៌មានពីប្រជាពលរដ្ឋ ចំណុចផ្លូវបេតុង ភូមិទ្រា២ សង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ។
ជនសង្ស័យដែលកម្លាំងឃាត់ខ្លួនបានចំនួន ១០នាក់ មានឈ្មោះដូចជា ៖ ១.ឈ្មោះចាន់ សារី ភេទប្រុស អាយុ១៩ឆ្នាំ មុខរបរកម្មករទុញរទះ ស្នាក់នៅទួលសង្កែ ។ ២.ឈ្មោះកែម ដារ៉ាវុធ ហៅបារាំង ភេទប្រុស អាយុ២៨ឆ្នាំមុខរបរកម្មករ រោងពុម្ភ ស្នាក់នៅផ្ទះជួល ភូមិទ្រា សង្កាត់ស្ទឹងមានជ័យ ទី១។ ៣.ឈ្មោះផាត ភីលីប ភេទប្រុស អាយុ១៧ ឆ្នាំមុខរបរមិនពិតប្រាកដ ស្នាក់នៅភូមិដំណាក់ធំ១ ។ ៤.ឈ្មោះចាន់ តុលា ភេទប្រុស អាយុ១៨ឆ្នាំ មុខរបរនិងទីកន្លែងស្នាក់នៅមិនពិតប្រាកដ។ ៥.ឈ្មោះរស់ រ៉ាន់ ភេទប្រុស អាយុ៣៥ឆ្នាំមុខរបររើសអេតចាយ ស្នាក់នៅ ផ្ទះជួល ភូមិទ្រា១។ ៦.ឈ្មោះហែម វិញ ភេទប្រុស អាយុ១៧ឆ្នាំមុខរបរអូសសំរាម ស្នាក់នៅភូមទ្រា។ ៧.ឈ្មោះលួន វិទូ ភេទប្រុស អាយុ១៧ឆ្នាំ មុខរបររើសអេតចាយ កន្លែងស្នាក់នៅមិនពិតប្រាកដ។ ៨.ឈ្មោះយួន សុភ័ក្រ ភេទប្រុស អាយុ៣០ឆ្នាំ មុខរបរ រើសអេតចាយ កន្លែងស្នាក់នៅមិនពិតប្រាកដ។ ៩.ឈ្មោះ សូត្រ សុវណ្ណារ័ត្ឋ ភេទប្រុស អាយុ៣០ឆ្នាំ មុខរបររើសអេតចាយ ស្នាក់នៅភូមិទ្រា១ សង្កាត់ស្ទឹងមានជ័យទី១។ ១០.ឈ្មោះហម សុខហៀង ភេទប្រុស អាយុ៣៩ឆ្នាំ មុខរបរមិនពិតប្រាកដស្នាក់នៅកន្លែងកើតហេតុ។
បច្ចុប្បន្នជនសង្ស័យនិងវត្ថុតាង ត្រូវបានបញ្ជូនទៅ ការិយាល័យបទល្មើសគ្រឿងញៀន នៃកងរាជអាវុធហត្ថរាជធានីភ្នំពេញ ដើម្បីសួរនាំបន្ត។
អាជ្ញាធរខណ្ឌមានជ័យ សូមបន្តធ្វើការអំពាវនាវដល់បងប្អូនប្រជាពលរដ្ឋ អ៊ុំមីងពូ ទាំងអស់ដែលរស់នៅក្នុងមូលដ្ឋានខណ្ឌមានជ័យទាំងមូល មេត្តាចូលរួមសហការជាមួយអាជ្ញាធរគ្រប់ពេលវេលា ក្នុងការផ្តល់នូវព័ត៌មាន ឬតម្រុយមួយចំនួនទាក់ទងទៅនឹងទីតាំងដែលពាក់ព័ន្ធនឹងអំពើល្មើសច្បាប់មិនថា តែទីតាំងដែលកំពុងលួចលាក់បើកហ្គេមបាញ់ត្រីឡើយ គឺរាល់ទីតាំងបទល្មើសផ្សេងៗទៀតមានដូចជា បៀរ អាប៉ោង កន្ទុយលេខ ជល់មាន់ជាដើម ដើម្បីមានភាពងាយស្រួល សម្រាប់អាជ្ញាធរក្នុងការចុះទប់ស្កាត់បង្ការ និងបង្ក្រាប ឲ្យសមស្រប ទៅនឹងគោលនយោបាយទាំង០៩ចំណុច របស់រាជរដ្ឋាភិបាលកម្ពុជា និងដើម្បីធានាបាននូវសន្តិសុខសុវត្ថិភាពជូនបងប្អូនប្រជាពលរដ្ឋរស់នៅប្រកប ដោយភាពសុខុដុមរម្យនាជានិរន្តរភាពចាប់ពីថ្ងៃនេះរហូតដល់ទៅថ្ងៃមុខ ។
ជាចុងក្រោយលោក ពេជ្រ កែវមុនី ក្នុងនាមជាអភិបាល និងជាប្រធានគណ:បញ្ជាការឯកភាពខណ្ឌមានជ័យ បានដាក់ចេញបទបញ្ជាយ៉ាងម៉ឺងម៉ាត់ ដល់លោកចៅសង្កាត់ទាំង៧ និងកងកម្លាំងមានសមត្ថកិច្ចទាំងអស់ កុំបណ្ដែតបណ្ដោយអោយសោះ ធ្វើយ៉ាងណាត្រូវយកចិត្តទុកដាក់បន្ថែម ត្រូវចេះសហការគ្នាអនុវត្តបទបញ្ជា ដើម្បីធ្វើការអន្តរាគមន៍ ទប់ស្កាត់ ក៏ដូចជាបង្ក្រាបលើបញ្ហាគ្រឿងញៀន និងទីតាំងល្បែងស៊ីសងគ្រប់ប្រភេទទាំងនោះ ដែលជាចំណុចស្នូល នៃការបង្កើតអោយ មានបទល្មើស លួច ឆក់ ប្លន់ និងពង្រឹងការបង្ក្រាបសកម្មភាព អសន្តិសុខផ្សេងៗជាច្រើនទៀត ជូនបងប្អូនប្រជាពលរដ្ឋក្នុងមូលដ្ឋានខណ្ឌមានជ័យ៕
