កម្លាំងនគរបាលខណ្ឌដូនពេញ បង្ក្រាបជនសង្ស័យម្នាក់ រួមជាមួយថ្នាំញៀនជាង ១០០កញ្ចប់
ភ្នំពេញ ៖ នៅវេលាម៉ោង ១២:១០នាទី ថ្ងៃទី០២ ខែឧសភា ឆ្នាំ២០១៩ កម្លាំងនគរបាលខណ្ឌដូនពេញ បានបង្ក្រាបជនសង្ស័យម្នាក់ រួមជាមួយថ្នាំញៀនជាង ១០០កញ្ចប់ និងវត្ថុតាងជាច្រើនទៀត ស្ថិតនៅចំណុចផ្លូវរថភ្លើងR6 ក្តាន់ពីរ ក្រុម៣៩ ភូមិ៣ សង្កាត់ស្រះចក ខណ្ឌដូនពេញ។
លោកវរសេនីយ៍ឯក ទៀង ច័ន្ទសារ អធិការនគរបាលខណ្ឌដូនពេញ បានឲ្យដឹងថា ជនសង្ស័យឈ្មោះ លឹម រតនា (ហៅអាពេជ្រ) ភេទប្រុស អាយុ២០ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅបន្ទប់ជួលទីតាំងខាងលើ (ជួញដូរគ្រឿងញៀន)។
វត្ថុតាងដែលសមត្ថកិច្ចចាប់យករួមមាន ៖ ក្រាមពណ៌សថ្លា សង្ស័យជាគ្រឿងញៀនចំនួន ១២៤កញ្ចប់ ( ០២កញ្ចប់ធំ), ជញ្ជីងថ្លឹងគ្រឿងញៀនចំនួន ០២, ដាវកែច្នៃចំនួន ០៤ដើម, ថង់សម្រាប់ច្រកគ្រឿងញៀនមួយចំនួន, ឧបករណ៍ប្រើប្រាស់គ្រឿងញៀនមួយចំនួន។
បច្ចុប្បន្ន កម្លាំងជំនាញរបស់អធិការដ្ឋាន កំពុងយកចម្លើយ បន្តស្រាវជ្រាវរកបក្ខពួក និងក្រុមដទៃផ្សេងទៀត ព្រមទាំងកសាងសំណុំរឿង ដើម្បីបញ្ជូនទៅសាលាដំបូងរាជធានីភ្នំពេញ អនុវត្តតាមនីតិវិធី ៕
