ជនសង្ស័យ ០២នាក់ ជាមួយថ្នាំញៀនជិត ០៥គីឡូក្រាម ត្រូវកម្លាំងសមត្ថកិច្ចបង្ក្រាបបាន
បន្ទាយមានជ័យ ៖ កាលពីម៉ោង ៣:០០នាទីរសៀល ថ្ងៃទី២៦ ខែមេសា ឆ្នាំ២០១៩ កម្លាំងជំនាញការិយាល័យប្រឆាំងគ្រឿងញៀន អាវុធហត្ថខេត្តបន្ទាយមានជ័យ សហការជាមួយកម្លាំងមូលដ្ឋានក្រុងប៉ោយប៉ែត បានឃាត់ខ្លួនជនសង្ស័យ ០២នាក់ ជាមួយនឹងថ្នាំញៀនជិត ០៥គីឡូក្រាម ដោយខុសច្បាប់ នៅចំណុចភូមិទួលពង្រ សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ។ សមត្ថកិច្ចបានឲ្យដឹងថា ជនសង្ស័យ ០២នាក់ រួមមាន ៖ ១.ឈ្មោះ សេក សាន ភេទប្រុស អាយុ៣២ឆ្នាំ ជនជាតិថៃ ខេត្តស្រះកែវ ប្រទេសថៃ និង២.ឈ្មោះ អាត់ សំរេច ភេទប្រុស អាយុ៣៧ឆ្នាំ ភូមិក្បាលស្ពាន សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។ វត្ថុតាងដែលសមត្ថកិច្ចចាប់បានរួមមាន ៖ គ្រឿងញៀនមេតំហ្វេតាមីនទឹកកកទម្ងន់ ២០៤១,៧ក្រាម និងគ្រឿងញៀនមេតំហ្វេតាមីនគ្រាប់ទម្ងន់ ២៩០៨,៤ក្រាម។ បច្ចុប្បន្នជនសង្ស័យទាំង ០២នាក់ និងវត្ថុតាង ត្រូវបានសមត្ថកិច្ចកសាងសំនុំរឿង បញ្ជូនទៅសាលាដំបូងខេត្តបន្ទាយមានជ័យ ចាត់ការតាមនីតិវិធីច្បាប់ ៕
