ទិវាក្តីស្រលាញ់រំលងបានមួយថ្ងៃ កូនចង្រៃលើកដៃ កាប់ឳពុកបង្កើត

ខេត្តកំពង់ចាម÷ កំលាំងអធិការនគរបាលស្រុកកងមាសបានឃាត់ខ្លួនកូនប្រុសអកត្តញ្ញូម្នាក់ដែលបានលើកដៃកាប់ឳពុកបង្កើតរបស់ខ្លួនបណ្តាលអោយរងរបួសធ្ងន់  កាលពីថ្ងៃទី15ខែកុម្ភះឆ្នាំ2019វេលាម៉ោង7:00នាទីនៅភូមិល្វាក្រោម ឃុំស្តៅ ស្រុកកងមាស ខេត្តកំពង់ចាម។ 

ប៉ូលិសបានអោយដឹងថា ករណីហិង្សាដោយចេតនាខាងលើនេះបង្ករ ដោយឈ្មោះ យ៉េន ចាន់ថា ភេទប្រុស អាយុ35ឆ្នាំ មានទីលំនៅភូមិល្វាក្រោម ឃុំស្តៅស្រុកកងមាស ខេត្តកំពង់ចាម បានយកពូថៅកាប់ទៅលើឈ្មោះ យ៉ង់ យ៉េន ភេទប្រុស អាយុ 68ឆ្នាំ ត្រូវជាឪពុកបង្កើត ខណៈពេលដែលឈ្មោះយ៉ង់ យ៉េនកំពុងអោនកាច់ចង្ក្រានហ្គាស់នៅចំណុចលើគ្រែ មុខផ្ទះរបស់គាត់នៅ ភូមិឃុំខាងលើបណ្តាលអោយរងរបួសខាងក្រោយទងត្រជៀកទាំងសងខាងនិងចំក្បាលខាងក្រោយរបួសធ្ងន់ត្រូវបានក្រុមគ្រួសារដឹកទៅព្យាបាលនៅមន្ទីពេទ្យកាលម៉ែតភ្នំពេញ។

ប្រភពព័ត៌មាននៅកន្លែងកើតហេតុបានអោយដឹងថា កូនប្រុសអកត្តញ្ញូនេះ មានអារៈមិនប្រក្រតី ហើយត្រូវឪពុក របស់ខ្លួនចាប់អោយគ្រូស្រោចទឹក  ទើបធ្វើអោយជនបង្ករនេះខឹងយកពូថៅលបកាប់ឳពុក។

ប៉ូលិសបានបញ្ជាក់ថាក្រោយពីធ្វើសកម្មភាពរួចជនសង្ស័យត្រូវបានឃាត់ខ្លួនដើម្បីសាកសួរបំពេញសំណុំរឿងតាមនីតិវិធី៕ ដោយ សាវ័ន្ថ