ប៉ូលិសស្រុកអូរយ៉ាដាវបានប្រទះឃើញរថយន្តបាឡែនមួយគ្រឿង ត្រូវបានគេយកមកលាក់ទុកនៅក្បែរច្រកទ្វារអន្តរជាតិអូរយ៉ាដាវ

ខេត្តរតនគិរី÷ កម្លាំងនគរបាលស្រុកអូរយ៉ាដាវបានរកឃើញរថយន្តបាឡែនមួយគ្រឿងត្រូវបានគេលួចយកមកលាក់ទុកនៅក្បែរច្រកទ្វារព្រំដែនអន្តរជាតិអូរយ៉ាដាវ ខេត្តរតនគិរី។

នគរបាលប្រទះឃើញរថយន្តបាឡែនកាលពីវេលាម៉ោង៩និង៣០នាទីព្រឹកថ្ងៃពុធ ១២កើត ខែមិគសិរ ឆ្នាំច សំរឹទ្ធិស័ក ព.ស២៥៦២ ត្រូវនិងថ្ងៃទី១៩ ខែធ្នូ ឆ្នាំ២០១៨ ស្ថិតនៅភូមិប៉ក់ធំ ឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរី។

នគរបាលស្រុកអូរយ៉ាដាវបានឲ្យដឹងថា រថយន្តមួយគ្រឿងត្រូវចោរលួចនោះម៉ាកកាមរី បាឡែន ផលិតនៅឆ្នាំ2002 ពណ៌ទឹកមាស ពាក់ស្លាកលេខសៀមរាប 2B-3110 ដោយគេបានលួចយកមកពីខេត្តសៀមរាបមកលាក់ទុកនៅខេត្តរតនគិរី។

នគរបាលបន្តថា ម្ចាស់រថយន្តមានឈ្មោះ វៀត ជីថាញ់ ភេទប្រុស បច្ចុប្បន្នរស់នៅភូមិតាវៀន ឃំុសាលាកំរើក ក្រុងសៀមរាប ខេត្តសៀមរាប។ រីឯជនសង្ស័យឈ្មោះ ប៉ាក់ តាឡាន់ ភេទប្រុស “ជាអ្នកលួចរថយន្ត” បច្ចុប្បន្នរស់នៅក្រុងបានលុង ខេត្តរតនគិរី បានបើករថយន្តពីខេត្តសៀមរាបមកលាក់ទុកនៅចំណុចផ្ទះឈ្មោះ អន ធី​​ នៅចំណុចភូមិប៉ក់ធំ ឃំុប៉ក់ញ៉ៃ ស្រុកអូរយ៉ាដាវ ដោយអ្នកលួចរថយន្តបានដឹងគំរោងការជាមុនថាសមត្ថកិច្ចនិងមកដល់កន្លែងលាក់រថយន្តនេះ ហើយបានខ្ចីម៉ូតូម្ចាស់ផ្ទះជិះរត់គេចខ្លួនបាត់ស្រមោល។

បច្ចុប្បន្នវត្ថុតាងបានរឹបអូសយកមករក្សាទុកនៅអធិការដ្ឋាននគរបាលស្រុកអូរយ៉ាដាវដើម្បីរងចាំប្រគល់ទៅឲ្យម្ចាស់រថយន្តទទួលយកទៅវិញ។

សូមបញ្ជាក់ថា ម្ចាស់ផ្ទះដែលជាប់ពាក់ព័ន្ធទៅហ្នឹងទទួលទុករថយន្ត ចោរលួចខាងលើនេះ តើសមត្ថកិច្ចហៅមកសួរនាំបញ្ហាខាងលើនេះឬទេ?៕ដោយ សាវ័ន