រថយន្តដឹកប្រេងសាំងសូគីមិចជ្រុលចង្កូតបុកក្មេងស្រីម្នាក់ស្លាប់យ៉ាងសង្វេគ

ខេត្តរតនគិរី÷ រថយន្តស៉ីទែនដឹកប្រេងសាំង(សូគីមិច)មួយគ្រឿងបើកជ្រុលចង្កូតទៅបុកអ្នកឈប់ម៉ូតូនៅចិញ្ចើមផ្លូវបណ្តាលឲ្យក្មេងស្រីម្នាក់ស្លាប់បាត់បង់ជីវិតភ្លាមៗមួយរំពេច។

ហេតុការណ៍គ្រោះថ្នាក់ចរាចរណ៍បានកើតឡើងនៅវេលាម៉ោង៣និង៣៥នាទីរសៀលថ្ងៃអង្គារ ៩កើត ខែមិគសិរ ឆ្នាំច សំរឹទ្ធិស័ក ព.ស២៥៦២ ត្រូវនិងថ្ងៃទី១៨ ខែធ្នូ ឆ្នាំ២០១៨ នៅតាមបណ្តោយផ្លូវជាតិលេខ៧៨ ចំណុចមុខពន្ធនាគារខេត្ត ស្ថិតនៅភូមិភ្នំស្វាយ សង្កាត់បឹងកន្សែង ក្រុងបានលុង។

មន្ត្រីនគរបាលប៉ុស្តិ៍បឹងកន្សែងបានឲ្យដឹងថា រថយន្តបង្កមួយគ្រឿងដឹកស៉ីទែនសាំង((សូគីមិច)ពាក់ស្លាកលេខភ្នំពេញ២១៣៧ចង្កូតស្តាំ បើកបរក្នុងទិសដៅពីកើតទៅលិចខណ:ចុះចំណោតបានជ្រុលចង្កូតទៅបុកក្មេងស្រីម្នាក់កំពុងអង្គុយនៅលើម៉ូតូទិញម៉ីឆារនៅចិញ្ចើមផ្លូវគិនបែកក្បាលស្លាប់ភ្លាមៗតែម្តង។

រីឯក្មេងស្រីរងគ្រោះឈ្មោះ ម៉េន ម៉ាន អាយុ១៨ឆ្នាំ ជនជាតិខ្មែរ មុខរបរកសិករ មានទីលំនៅភូមិ/ឃុំកើតហេតុខាងលើ ជិះម៉ូតូមួយគ្រឿងម៉ាក ហុងដាឌ្រីម C១២៥ ស៊េរីឆ្នាំ២០១៧ ពណ៌ខ្មៅ ពាក់ស្លាកលេខ រតនគិរី ១A-៤៩១៧ ក្នុងទិសដៅពីកើតទៅលិច(ស្លាប់)។

ក្រោយកើតហេតុអ្នកបើកបររថយន្តបង្កបានចុះរត់គេចខ្លួនបាត់បន្សល់ទុករថយន្តនៅកន្លែងកើតហេតុ។

បន្ទាប់មកសមត្ថកិច្ចមូលដ្ឋាននិងនគរបាលចរាចរណ៍ខេត្តចុះមកអន្តរាគមន៍ធ្វើការត្រួតពិនិត្យនៅកន្លែងកើតហេតុ និងប្រគល់សាកសពទៅឲ្យសាច់ញាតិយកទៅធ្វើបុណ្យតាមប្រពៃណី។
ដោយឡែកមធ្យោបាយទាំង២គ្រឿងត្រូវបាននគរបាលរឹបអូសយកមករក្សាទុកនៅការិយាល័យចរាចរណ៍នៃស្នងការដ្ឋាននគរបាលខេត្តដើម្បីរងចាំធ្វើការដោះស្រាយទៅតាមផ្លូវច្បាប់៕ដោយ សាវ័ន