បើករថយន្តមិនប្រយ័ត្ន ប៉ះម៉ូតូបណ្តាលឲ្យយុវជន២នាក់របួសធ្ងន់

ខេត្តរតនគិរី÷ ករណីគ្រោះថ្នាក់ចរាចរណ៍រវាងរថយន្តនិងម៉ូតូ បណ្តាលឲ្យមនុស្ស២នាក់បានរងរបួសធ្ងន់ធ្ងរ ។

ហេតុការណ៍គ្រោះថ្នាក់ចរាចរណ៍បានកើតឡើងកាលពីវេលាម៉ោង២និង១៥នាទីរសៀលថ្ងៃចន្ទ ៣កើត ខែមិគសិរ ឆ្នាំច សំរឹទ្ធិស័ក ព.ស២៥៦២ ត្រូវនិងថ្ងៃទី១០ ខែធ្នូ ឆ្នាំ២០១៨ នៅតាមបណ្តោយផ្លូវជាតិលេខ៧៨ ចំណុចមុខផ្ទះឈ្មោះ ហួរ សារឹទ្វេ ស្ថិតនៅភូមិសិ៍ល សង្កាត់យក្ខឡោម ក្រុងបានលុង ។

លោក ជាង ហឿង នាយប៉ុស្តិ៍សង្កាត់យក្ខឡោមបានឲ្យដឹងថា ម៉ូតូ១គ្រឿងម៉ាកវ៉េវឆ្លាម ពណ៌ខ្មៅ ស៊េរីឆ្នាំ២០១៧ ពាក់ស្លាកលេខភ្នំពេញ ១B-៨៥៨៨ បើកបរដោយឈ្មោះ តេវ ញឿង ភេទស្រី អាយុ១៦ឆ្នាំ ជនជាតិទំពួន មុខរបរសិស្ស មានទីលំនៅភូមិកប ឃុំទីងចាក់ ស្រុកបរកែវ ខេត្តរតនគិរី (របួសធ្ងន់) ខណ:បើកបរក្នុងទិសដៅពីកើតមកលិច។

អ្នករួមដំណើរម្នាក់ឈ្មោះ តេវ សីវិន ភេទប្រុស អាយុ១៤ឆ្នាំ ជនជាតិទំពួន មុខរបរសិស្ស ត្រូវជាប្អូន បានរងរបួសធ្ងន់ ។

ចំណែករថយន្តបង្កមួយគ្រឿងម៉ាកហ៉ីយ៉ាន់ដាយ (ផ្លូវ៥) ពណ៌ទឹកបិចលាយស ពាក់ស្លាកលេខកំពង់ចាម ៣A-៦៦៤១ អ្នកបើកបរមិនស្គាល់អត្តសញ្ញាណក្រោយកើតហេតុបានចុះរត់គេចខ្លួនបាត់ស្រមោល បន្សល់ទុករថយន្តនៅកន្លែងកើតហេតុ បើកបរក្នុងទិសដៅស្របគ្នា ។

លោកនាយប៉ុស្តិ៍រូបនេះបានបន្តថា មុនពេលកើតហេតុ ម៉ូតូ១គ្រឿងជិះដោយយុវជន២នាក់ ស្របពេលនោះដែរមានរថយន្តខាងលើបានជែងម៉ូតូជនរងគ្រោះនៅពីមុខមិនផុតក៏ប៉ះដៃចង្កូតជនរងគ្រោះបណ្តាលឲ្យដួលម៉ូតូទៅហ្នឹងផ្លូវថ្នល់រងរបួសធ្ងន់ ។

ក្រោយកើតហេតុនគរបាលមូលដ្ឋាននិងនគរបាលចរាចរណ៍បានចុះមកអន្តរាគមន៍ធ្វើការវាស់វែងដឹកបញ្ជូនជនរងគ្រោះទៅសង្គ្រោះបន្ទាន់នៅមន្ទីរពេទ្យបង្អែកខេត្ត ។

ដោយឡែកមធ្យោបាយទាំង២គ្រឿងត្រូវបាននគរបាលរឹបអូសយកទៅរក្សាទុកនៅការិយាល័យចរាចរណ៍នៃស្នងការដ្ឋាននគរបាលខេត្តដើម្បីរងចាំធ្វើការដោះស្រាយនៅពេលក្រោយ ៕ដោយ សាវ័ន