ម៉ូតូ WAVE ២គ្រឿង សាកកម្លាំងគ្នា របួសធ្ងន់ស្រាល៤នាក់
ខេត្តរតនគិរី÷ មនុស្សចំនួន៤នាក់ បានរងរបួសធ្ងន់ស្រាល បន្ទាប់ពីជួបគ្រោះថ្នាក់ចរាចរណ៍រវាងម៉ូតនិងម៉ូតូបោលបុកគ្នាពេេញទំហឹងកាលពីវេលាម៉ោង៤នឹង៥៥នាទីល្ងាចថ្ងៃព្រហស្បតិ៍ ៧រោច ខែកត្តិក ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២៩ ខែវិច្ឆិកា ឆ្នាំ២០១៨ ស្ថិតនៅត្រង់ចំណុចភូមិលូត ឃុំទីងចាក់ ស្រុកបរកែវ។
សមត្ថកិច្ចនគរបាលស្រុកបរកែវ បានឲ្យដឹងថា គ្រោះថ្នាក់ចរាចរណ៍នេះ បង្កឡើងដោយម៉ូតូមួយគ្រឿងម៉ាក wave ពណ៌ត្រាវ ពាក់ស្លាកលេខស្វាយរៀង1A-5523 បើកបរឈ្មោះ ហម សុវិត្ថ ភេទប្រុស អាយុ២២ឆ្នាំ ជនជាតិខ្មែរ។ អ្នករួមដំណើរ២នាក់ទៀត ទី១-ឈ្មោះ ឡេង ម៉េងគីម ភេទប្រុស ទី២-ឈ្មោះ ជាវ ម៉ាប់ ភេទប្រុស អ្នកទាំង៣នាក់ រស់នៅភូមិឡុំ ឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរី បើកបរក្នុងទិសដៅពីកើតទៅលិច លុះមកដល់ចំណុចកើតហេតុ បានជែងនឹងរថយន្តមួយគ្រឿង ក៏ជ្រុលចង្កូតទៅបុកម៉ូតូមួយគ្រឿងម៉ាក Wave I ពណ៌ខ្មៅ គ្មានស្លាកលេខ បើកបរដោយឈ្មោះ ឈឿន អុន ភេទប្រុស អាយុ ៣១ឆ្នាំ ជនជាតិខ្មែរ មុខរបរ កម្មករជៀជរ័ រស់នៅភូមិទូយ ឃុំទីងចាក់ ស្រុកបរកែវ ខេត្តរតនគិរី ខណ:កំពុងបត់ឆ្វេងឆ្លងផ្លូវ បណ្ដាលឲ្យរងរបួសធ្ងន់ស្រាលទាំងសងខាង ត្រូវបានរថយន្តសង្គ្រោះដឹកបញ្ជូនទៅមន្ទីរពេទ្យភ្លាមៗផងដែរ។
ក្រោយកើតហេតុកម្លាំងនគរបាលប៉ុស្តិ៍ទីងចាក់ បានយកម៉ូតូទាំងពីរគ្រឿង មករក្សាទុកបណ្ដោះអាសន្ននៅប៉ុស្តិ៍ ដើម្បីរង់ចាំធ្វើការដោះស្រាយនៅពេលក្រោយ៕ដោយ សាវ័ន
