ឃាត់ខ្លួនលោកសង្ឃមួយអង្គ ក្រោយយកដែកឆាបចាក់សម្លាប់ស្ត្រី
បន្ទាយមានជ័យ៖ ព្រះសង្ឃមួយអង្គត្រូវបានកម្លាំងនគរបាលក្រុងប៉ោយប៉ែត ឃាត់ខ្លួនយកទៅសួរនាំ ក្រោយបានធ្វើសកម្មភាពយកដែកឆាបចាក់លើរូបរាងកាយលើស្ត្រីអាជីវករវេលុយវីងម្នាក់បណ្តាលឲ្យរបួសធ្ងន់ ដែលមិនត្រូវបានគេដឹងថាផ្តើមចេញពីទំនាស់អ្វីឲ្យប្រាកដនៅឡើយទេ កាលពីវេលាម៉ោង១០ព្រឹកថ្ងៃទី២៤ ខែវិច្ឆិកា ឆ្នាំ២០១៨នេះ នៅចំណុចដីវាលអូរខៃដន សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ តែជំហ៊ានដំបូងត្រូវមជ្ឈដ្ឋានប្រជាពលរដ្ឋសង្ស័យរឿងស្នេហាត្រីកោណ។
ព្រះសង្ឃដែលត្រូវនគរបាលឃាត់ខ្លួនមានព្រះនាម ឈ្មោះទន់ សាវន អាយុ៥២ឆ្នាំ សង្ឃអង្គនេះគង់នៅវត្តស្វាយចាស់ ក្នុងភូមិកំពង់ស្វាយ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ។ រីឯស្ត្រីរងគ្រោះមានឈ្មោះ សេង ផល្លា អាយុ៤៦ឆ្នាំ របួសធ្ងន់ ជាអាជីវករវេលុយវីង នៅភូមិផ្សារកណ្តាល សង្កាត់ផ្សារកណ្តាល ក្រុងប៉ោយប៉ែត។ ពេលនេះត្រូវបានគេបញ្ជូនទៅសង្គ្រោះក្នុងមន្ទីរពេទ្យមួយ នៅទីក្រុងបាងកកប្រទេសថៃ។
ប្រភពពីសាក្សីនៅម្តុំកន្លែងកើតហេតុ បានឲ្យដឹងថានៅព្រឹកថ្ងៃសៅនេះ មុនពេលមានបញ្ហាគេបានឃើញស្ត្រីម្នាក់ខាងលើ បើករថយន្តម៉ាកហាយឡិនដ័រ មកកាន់ចំនុចអូរខៃដន ក្រោយមកស្រាប់តែមានព្រះសង្ឃទន់ សាវន បានដើរពីម្តុំគេលក់ឥវ៉ាន់មកចូលក្នុងឡាន បានមួយសន្ទុះក៏ស្រាប់តែមានការប្រើអំពើហិង្សាកើតឡើង ដែលបង្កដោយលោងសង្ឃអង្គនេះ បានយកដែកឆាបមកប៉ងសម្លាប់ស្ត្រីរងគ្រោះ ត្រូវបានអ្នកស្រុកឃើញផ្អើលឆោឡោរ បានរាយការណ៍ជូនទៅសមត្ថកិច្ចចុះមកអន្តរាគមន៍និងឃាត់ខ្លួនព្រះសង្ឃអង្គនោះបានភ្លាមៗតែម្តង។
ពាក់ពន្ធ័ករណីខាងលើ លោក ធិន ស៊ិនដេត អធិការនគរបាលក្រុងប៉ោយប៉ែត បានឲ្យដឹងថា ក្រោយពីរកឃើញបទល្មើស លោកបានរាយការណ៍ជូនទៅខាងការិយាល័យធម្មការនិងសាសនា ហើយក៏បានធ្វើពិធីផ្សឹកសង្ឃអង្គនេះរួចរាល់ផងដែរ។បច្ចប្បន្នជនសង្ស័យ កំពុងស្ថិតនៅក្រោមការសួរនាំរបស់នគរបាលនៅអធិការដ្ឋាននគរបាលក្រុងប៉ោយប៉ែត។
លោកបន្តថា អនុវត្តន៍តាមបទបញ្ជារបស់លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមាជ័យ លោកឧត្តមសេនីត្រី សិទ្ធ ឡោះ ស្នងការរងទទួលផែនព្រហ្មទណ្ឌនិងមានការសម្របសម្រួលនិតិវិធិដោយ លោក មាស ច័ន្ទពិសិដ្ឋ ព្រះរាជអាជ្ញាអមសាលាដំបូងខេត្តបន្ទាយមានជ័យ ចំពោះជនសង្ស័យ ទន់ សាវន ត្រូវចាប់ខ្លួនពីបទមនុស្សឃាតដោយចេតនា គិតទុកជាមុន។ ពេលនេះសមត្ថកិច្ចកំពុងសួនាំនិងកសាងសំណុំរឿងបញ្ជូនទៅតុលាការចាត់ការតាមនិតិវិធីច្បាប់៕
